7
يناير
2023
بعض شخابيطي على سبورة الوطن الجريح ٠ الشاعر كريم الحميضي
نشر منذ 9 شهر - عدد المشاهدات : 477

بعض شخابيطي على سبورة الوطن الجريح
الدنيه٠٠٠رمشة عين وتسافر عجل
الدنيا٠٠٠خربانه كبل يوم الأجل
الدنيا صارت مسرح لأهل الدجل
ونسكت٠٠اوما انكول ذوله اهل الدجل
يا مدينة صبري٠٠اخاف من الصبر
وانت اجمل ما كتبت من الزجل
مستحه اخدودج مثل ضربة شمس
يستحي منها الخجل ٠٠يا للخجل 
انت اجمل من زليخة ليوزرسيف  وموناليزا الينضرب بيها المثل
انتي جن يوم القيامه بذكرياتي 
وحافظك اي والنبي منذ الازل 
آمنين الي جابك الاهي يا ملاكي 
البيج نساني صحبتي والأهل
اشتكي عد من ٠٠عليمن
وانه روحي معلعله وردتك امل
راح اسلمك والله مو من كلبي اسلمك 
بيد ربي الخالقك عز وجل
زركة اعيونك سمه بلايه سمه
وتستحي منها القوافي والجمل 
وغيمة اعيونك مطر وبلايه ماي 
افيش لو بيها ابمواعيدك اجل 
بيك أشعر جن ابوي المتنبي 
عاف فرسه او وكف لجلك وارتجل 
الحب صلاتي٠٠٠الحب حياتي
الحب مثل كعبه وصعب بيها الدجل
انت لاتستغل ضعفي في محبتك 
والزعل يكسب بلياك الزعل
انت يا مفطوم من ماي الفرات
مره غنيلي بمواويلك غزل
وسوي من ضلعي مراجيح الحياتك وطير وي الهوى واحضني بقبل
يا زقورة اور٠٠يا سومر محبتي 
انت نغمة عمري٠٠من دونك شلل
لا اتغير قصتي واول قصيده 
تره من دونك٠٠٠احسن بالشلل 
يا عراق٠٠٠ارجوك عيش ٠٠ابلا عراك
حتى الاعمه ٠٠اينبهك من الزلل 
وانت عاد٠٠ابكيفك اتحب الحياة
لو تريد الموت وتخلف جهل
لو تريد الموت وتخلف جهل 
الدنيه رمشة عين وتسافر عجل

صور مرفقة






أخبار متعلقة
مشاركة الخبر
التعليق بالفيس بوك
التعليقات
اعلانات تجارية
اعلانات تجارية
استطلاع رأى

هل انت مع الجيش العراقي ؟

0 %

0 %

0 %

عدد الأصوات : 0

أخبار