يماي الچان يرويني يريعي وثمرة سنيني . الشاعر حيدر الجابري

10
يناير

2021

نشر منذ Jan 10 21 pm31 07:46 PM - عدد المشاهدات : 492

يماي الچان يرويني

يريعي وثمرة سنيني

يتفاحة شبابي الباگهه التابوت

عگبك شيبي خيل وجيش غازيني

انه بلياك ماچن عمري بالخمسين

طفل شايب صرت ونحاس تكويني

چنت وياك روحي مخالطه الظحكات

هسه وداعتك بس دمع يچويني

چنت اول اسم تخطر بوكت الظيج

ومن ازعل چنت بس انته ترظيني

چان البيت جنه وگلبك البستان

هسه احزان مرسومه بحياطيني

چنت خيمه وستر والشرب والمقسوم

عگبك ما بقت خامه التغطيني

گبل چانت حياتي وياك عشبه وماي

يبس ريعي يماي الچنت تسگيني

صرت عود بصحاري وشح عليه الغيم

وحطبني الوكت وبفاسه ماذيني

كرهت البيت عگبك ما اريد البيت

اريد الموت چي يمك يوديني

الورده ابلا غصن وبلا عرج بالطين

تذبل وآنه ورده وفارگت طيني

اظن هاي اخر الانفاس والچلمات

اشوف الموت اخيرن راح يلفيني

افرح من اموتن عكس اليموتون

لان الموت وي روحي يلاگيني

حيدر الجابري /٨/١/٢٠٢١

صور مرفقة

أخبار متعلقة

مشاركة الخبر

التعليق بالفيس بوك

التعليقات

اعلانات تجارية

استطلاع رأى

أخبار